Executive日記——讓夜蒲箭豬過路 司機有禮!

  不時都會有野豬闖入鬧市,但箭豬就真係少見啲。Kelly留意到網上流傳一段短片,發現三隻箭豬深夜時分喺港島寶馬山雲景道附近夜蒲,一隻跟住一隻過馬路,路過嘅司機仲專登停車,讓佢哋過咗先,真係好有愛!

  根據短片,當時應該係寶馬山雲景道一帶,有一大兩細箭豬喺雲景大廈對開出現,一隻跟住一隻過馬路,急急腳咁走非常得意,相信正喺度覓食。有一部私家車嚟到見到三隻箭豬,專登停低,等佢哋安全抵達另一邊行人路。

  漁農自然護理署就指香港經常出沒嘅箭豬其實係「東亞豪豬」,身體前端佈滿三十至五十毫米長嘅深棕色短棘毛,喺山林居住,間中都會喺市區山邊出沒,一般唔會主動攻擊人,建議市民唔好走近同打擾佢哋。

Kelly Chu


hd