Executive日記——澳門冬奧主題鈔票 僅推200萬張勢掀炒風

  東京夏季奧運會將於今年七月上演,而冬季奧運定於明年喺北京舉行。澳門一向緊貼內地嘅潮流,決定發行以慶祝北京冬奧主題嘅澳門鈔票,一共二百萬張。呢個消息傳到香港,即刻引起鈔票迷關注,事關發行量唔算大,加上港澳仲未通關,想買未必咁易買到,料會掀起炒風咁話。

  澳門特區政府行政會議喺上周一完成討論《發行慶祝第二十四屆冬季奧林匹克運動會的澳門元二十圓紙幣》行政法規草案,由公佈日起生效。個法案名水蛇春咁長,其實係話,容許中國銀行發行以慶祝冬奧為主題嘅紙幣,面額二十澳門元,發行限量係二百萬張。

  有收藏鈔票人士對Kelly講,唔好以為二百萬張好多,以紙鈔發行量嚟講,只係一個小數量,所以好多人都想要,但受疫情影響,香港人暫時過唔到澳門,而澳門市場又細,香港和國內想要嘅人多,好容易炒得起,加上第一張(俗稱膽)最受歡迎,應該好多人去搶。

  有鈔票迷話,聽聞澳門已經有很多艇仔準備搶購呢款紀念鈔,應該會鈔得起,話「收益一定夠飲茶」。

Kelly Chu


hd