Executive日記——毛漢發起籌款助印度抗疫

  印度疫情嚴峻,Kelly嘅印裔老友毛漢,一早洞悉事態嚴重,早喺港府「熔斷機制」實施之前,就呼籲叫停印度來港航班。毛漢話,佢喺當地嘅朋友話,印度疫情猶如一場噩夢,染疫死者嘅屍體堆積如山,情況好惡劣。毛漢話,自己只有好少遠房親戚喺印度,但依然心繫家鄉,將發起籌款活動,會喺尖沙咀天星碼頭募捐,希望籌得三百萬,用於購買醫療設備,即刻送去印度接濟同鄉。

  身為香港印度協會前主席嘅毛漢,一直關注印度疫情嘅發展,早喺幾個月前,佢就奔走協助滯留印度嘅港人回港。最近,有趕唔切返港嘅朋友同佢講,當地醫療和衞生設備好短缺,有大量肺炎死者嘅屍體,「唔夠地方同人手燒」,集體燒屍亦有違印度教嘅傳統,而且當地貪污問題嚴重,令唔少人得唔到適切嘅治療,導致問題雪上加霜。Kelly聽到都好傷感。

  毛漢無奈地同小妹講:「印度一定要人幫手!」毛漢知道香港人好熱心做善事,話計劃短期內會喺尖沙咀天星碼頭發起籌款活動,目標係籌三百萬港元,用嚟購買氧氣機寄去印度,希望紓緩當地醫療器材嚴重缺乏嘅問題。小妹呼籲大家,稍後見到毛漢籌款,請大家幫手。

Kelly Chu


hd