Executive日記——提議搵姜B宣傳打針 何栢良冀吸引市民接種

  港大感染及傳染病中心總監何栢良每早上電台,分享抗疫數據,等大家小心啲,Kelly日日都有收聽。眼見變種病毒愈嚟愈惡,多國疫情反彈,何栢良希望市民積極接種疫苗,仲好有創見咁建議政府考慮邀請高人氣嘅歌手或者藝人,好似男子組合Mirror嘅姜濤等,喺平台公開呼籲粉絲打針,吸引一眾「姜糖」支持喎!

  其實請藝人呼籲接種疫苗,內地就先行一步,好似上海虹口區,早前邀請女子偶像團體SNH48擔任公益宣傳大使,去到疫苗接種現場,為粉絲蓋章,成為網絡熱話。本港疫苗接種率唔高,何栢良就諗到利用明星效應,建議政府邀請萬人迷姜濤等藝人,「叫佢哋喺IG講兩句,呼籲市民打疫苗」,相信會帶動更多市民願意打針。

  年僅二十二歲嘅姜濤,一八年獲ViuTV節目《全民造星》冠軍後,人氣持續高企,早排仲做埋預防HPV廣告嘅代言人。經理人花姐覆返,暫時未收到合作邀約,姜濤最近籌備緊Mirror演唱會,十分忙碌,至於會唔會打針就係後話。網上唔少人都支持何栢良嘅建議,覺得姜濤可以再下一城,仲話可以邀請埋另一男子組合Error隊長肥仔一齊宣傳,兩個人拍住上咁話。

Kelly Chu


hd