Executive日記——主教山配水庫 議員促打造「打卡位」

  逃過濫拆命運嘅深水埗主教山古羅馬式建築配水庫,正在做緊加固工程。發展局話,配水庫位於地底嘅密閉空間,日久失修,要通過加固工程,改善排水、防水等設施,確保結構安全先得,當局目標係今年底首階段有限度向市民開放。Kelly好期待,好想去打卡留念。

  發展局副局長廖振新話,局部開放之後,仲會推出長遠嘅活化方案,會再諮詢公眾,暫未有時間表。據Kelly所知,配水庫所在嘅深水埗,其實係一個文創區,例如係南昌街、基隆街一帶,近年自生咗好多咖啡、時裝、手工飾物、自製皮具等小店。喺立法會大會上,民建聯鄭泳舜就建議政府,其實可以將配水庫加入文創區,屆時一併推廣地道嘅文化特色。

  經民聯梁美芬話,當局可以參考日本經驗,將配水庫變成電影拍攝景點,打造成東南亞區著名嘅旅遊「打卡位」。

  商經局局長邱騰華回應話,當局會考慮上述建議,又形容其實兩年前已推出過深水埗嘅推廣項目,且獲部份國際旅遊雜誌推薦,證明香港嘅本地遊有發展潛力。

Kelly Chu


hd