Executive日記——李我遺孀蕭湘憶相識經過 一手好文章成就播音員姻緣

  「播音天王」李我前日離世,享年九十九歲,同佢結婚逾七十載嘅蕭湘,亦係著名女播音員。蕭湘憶及亡夫時話,當年初遇李我,人又瘦,得八十磅,又着黑色闊身褲,好似着裙,外形一啲唔討好,但相處落嚟,李我待人和善無架子,仲因佢寫得一手好文章,獲男方垂青,成為工作上嘅好拍檔,最後結為夫妻。

  李我其中一個徒弟,係日後成為佢妻子嘅蕭湘。蕭湘昨早喺商台《晴朗一天出發》中對丈夫離世感到憂傷,形容丈夫喺廣播業嘅發展上佔有一席重要地位:「他無稿無劇本,桌上一張紙都無,入直播室關燈作『單人講述』,一個人扮八把聲,奶奶又得、小姐又得、小朋友又得……加上音效,當時都係只靠一把聲創作出來嘅。」

  蕭湘話,佢當年加入電台,由於寫得一手好文章,獲李我重用,叫佢將播音內容抄寫成文,畀各大報章轉載,原來好多人錯過咗廣播,第二日會搵報紙嚟睇,所以李我嘅專欄亦紅透報界。

  另外,蕭潮順亦喺社交平台發文悼念李我,話早年入錄音室用咗幾晚時間訪問李我,將佢生平所見所聞用聲音保存下來,當中涉及醫卜星相、梨園軼事、名人奇事,非常有趣,並結集成「好聲」社企嘅第一本有聲書。

Kelly Chu


hd