Executive日記——最佳觀賞 記得向東南方 「超滿月」撞正月全食 5‧26有得睇

  Kelly留意到天文台嘅公告,話今個月二十六日,市民有機會觀賞到月全食,仲會係今年全年出現最大嘅滿月,叫做「超級滿月」,屆時月亮嘅直徑會比平時嘅滿月大約百分之七。如果想搶佔靚位觀月,只要天氣情況許可,面向東南方兼無障礙物遮住,就係觀賞月食過程嘅最佳位置。

  月全食喺當晚七點零九分開始,直至七點二十八分結束,食甚時間係七點十九分。今次月全食會喺月出前開始,所以月亮會帶食而出,期間月亮唔會完全消失,而係會呈現出暗紅色,咁係因為太陽光中藍色嘅波段喺地球大氣層散射過程中被散射,剩餘嘅紅光再被折射到月球表面。

網上聯合直播

  另外,大家亦可透過香港天文台、香港太空館、嗇色園主辦可觀自然教育中心暨天文館和保良局顏寶鈴書院嘅聯合網上直播,想睇晒成個月食過程,請瀏覽網址:www.hko.gov.hk/tc/gts/event/webcast-20210526.htm。下一次要喺香港睇月食,就要等到今年十一月十九日出現嘅月偏食。

Kelly Chu


hd