Executive日記——「糟糕灣」劣食層出不窮 隔離市民瘦咗幾公斤

  竹篙灣檢疫中心膳食差到一個點,接受檢疫嘅市民嬲到爆,即使換咗之前「粟米肉磚飯」供應商,但市民批評新供應商一樣係劣食,好似番茄意粉,竟然係無汁、無鹽、無油嘅「三無添加」白烚意粉,仲有雪藏味好勁嘅肉,令人諗起「殭屍肉」,爆料者形容入營二十一天「無啖好食」,「放監」後瘦咗幾公斤!Kelly聽見到打個震,當局搞到「竹篙灣」變「糟糕灣」!

  市民陳小姐早前被列為變種病毒確診人士嘅密切接觸者,入竹篙灣檢疫中心隔離二十一天,入去前已有心理準備食物好差,點知超乎想像,「無諗過難食到咁」,番茄意大利麵係無汁、無鹽、無油的「無添加」白烚意粉,「都有幾粒好細嘅番茄,無違反《商品說明條例》」,大部份肉類一陣濃烈嘅雪藏味,疑係急凍存放多年嘅「殭屍肉」,應該冇將肉類「飛水」除去雪藏味,「唔知呢位廚師敢唔敢食自己煮嘅嘢?」

  仲離譜嘅係,陳小姐指某天收到好像曾經被老鼠偷吃、爆殼兼且甩掉部份蛋白的水煮雞蛋。至於蔬菜,一日三餐係白烚椰菜同紅蘿蔔,「食到厭,監獄都會換下菜單卦!」佢唯有進食自行帶備嘅餅乾同跟餐嘅水果,結果「強逼瘦身!」離營時瘦咗幾公斤。

Kelly Chu


hd