Executive日記——疫情比新聞報道嚴重 毛漢募捐救同胞 港商一擲20萬助印度

  印度疫情,令人心驚膽戰,近期每天仍有逾三十萬人確診,仲有大批病人等待救援。喺香港嘅印裔人士情繫同胞,佢哋昨天發起募捐行動,先喺錫克教廟外呼籲信眾捐錢,等政府發出籌款牌之後,就會上街收集善款。發起人之一嘅毛漢話,印度死傷數字比官方統計大得多,好需要抗疫物資,令佢感動嘅係,有一名香港商人捐出二十萬元。

  毛漢對Kelly話,據佢所知,印度疫情比新聞報道嘅嚴重得多,估計好多印度教徒喺家中死亡,政府未必知道。點解會咁?原來好多病人被送入醫院後死咗,會被集體火化,但印度教就規定死者單獨火化,「所以好多印度人確診之後,唔想入醫院,留喺家中,死咗政府都未必知。」佢話,當地好缺乏醫療物資,「好多嘢都被人搶貴晒!」所以在港印裔人希望透過籌款,購買幫助呼吸嘅機械,緊急送去印度,盡力救助更多病人。

冀更多企業伸援手

  毛漢話,昨天主要在錫克教廟門外向信眾募捐,等政府發出牌照,佢哋就會喺油尖旺同灣仔向公眾籌款。令佢感動嘅係,唔少香港人伸出援手,「有一個姓廖嘅商人捐咗二十萬,真係好多謝佢。」佢希望更多大企業同富豪慷慨捐輸,幫印度人抗擊今次嚴重嘅疫情。

Kelly Chu


hd