Executive日記——比Art Basel快一步 藝術月重來 太古城有趣裝置藝術 坐得玩得任你探索

  去年Art Basel受疫情影響停咗一年,今年捲土重來,Kelly同好多藝術愛好者好渴望見吓啲七彩繽紛嘅展品,而各界嘅藝術風即時刮起,好似太古地產就舉行藝術月,喺太古城擺放咗一個大型裝置藝術品「Please Be Seated 」(請就座),Kelly見到,童年記憶返晒嚟,想玩瀡滑梯、捐山窿,同行嘅朋友就猛咁打卡,話放上社交平台一定呃好多like。

  太古地產藝術月去年亦停辦,今年節目涵蓋巨型藝術裝置同多媒體展覽,其中請來保羅.考克塞兹工作室(Paul Cocksedge Studio)嘅英國著名設計師Paul Cocksedge,呈獻嘅大型木製藝術裝置「Please Be Seated 請就座」,仲係為香港設計嘅專屬全新版本,將於呢個星期三起喺太古公園亮相。

  「請就座」以高拱低彎嘅大波浪形呈現,為參觀者創造可穿越探索,或坐吓休息放鬆嘅空間。太古地產朋友話,件作品彰顯佢哋對可持續發展嘅重視咁話。呢件裝置藝術充滿流麗線條,會喺太古公園作永久展出,等小妹得閒去坐下先。

Kelly Chu


hd