Executive日記——離目標仍遙遠 籲大企業伸援手 毛漢募捐助印度 煲呔同振英都撐

  愈來愈多地方嘅疫情反彈,陷於水深火熱嘅印度,被關注度減低,但該國的疫情比想像中嚴重。在港印裔僑領毛漢對Kelly話,佢收到消息,話印度政府叫當地傳媒淡化情況,其實印度疫情仍然好嚴重,所以佢在港發起籌款,得到好多人支持,連兩位前特首曾蔭權同梁振英都捐錢,佢正在街上募捐,初步籌到一百五十萬元,但離目標好遠,希望大企業出手,助印度渡過難關。

  喺剛過去嘅周六,毛漢獲當局發牌喺尖沙咀Isquare外設檔位向公眾募捐,好多香港人行過都捐錢,昨天周日街上就較多外傭,捐錢嘅人少咗。毛漢話,佢哋下個周六會喺銅鑼灣Sogo外同灣仔外向公眾籌款,希望大家幫手,盡一份心意,集腋成裘,籌足三百萬元,去購買氧氣機,拯救大批入院嘅印度確診者。

  毛漢指出,加埋早前個人籌款,迄今一共籌到一百五十萬元,善長中包括兩位前特首曾蔭權同梁振英,仲有一啲名人,佢亦寫信畀啲相熟嘅政經界好友,請佢哋伸出援手,但佢最希望大企業支持,令到更多印度人得救。

Kelly Chu


hd