Executive日記——賞你遊2.0 旅發局公佈130個行程

  旅發局去年推出「賞你遊香港」活動大受歡迎,最近加推第二輪,今日起接受報名。市民只要喺實體店消費兩次滿八百蚊,就可以免費換一次本地遊,名額兩萬個,先到先得。Kelly知道首批一百三十個行程揭盅,任大家揀喜愛嘅主題,好似美食及工藝、捕魚、田園耕作體驗等,部份行程仲會去酒店歎自助餐,或者坐船去離島食海鮮等等,好豐富!

  新一輪「賞你遊香港」活動提供大約一百九十個行程,市民今日起可以喺旅發局網站,率先揀選首批約一百三十個行程,再直接向相關旅行社報名。獲旅行社確認成功報名後,參加者就要向提交消費單據證明,同時繳交一百蚊按金,旅行社之後會退返畀參加者。至於第二批約六十個行程,就會喺六月中公佈。旅發局朋友對Kelly講,唔少行程都會安排參加者去星級酒店食自助餐、到鯉魚門、流浮山或者南丫島食海鮮等。

  另外,通常半日嘅行程都會到訪至少兩個景點,部份旅行社仲會帶遊客去香港杜莎夫人蠟像館、坐香港摩天輪,或者到飛機維修區睇日落,果然係吃喝玩樂齊晒。

Kelly Chu


hd