Executive日記——第二輪「賞你遊」 唔少旅行團即時額滿

  旅發局加推嘅第二輪「賞你遊香港」活動,每人消費二次合共八百蚊,就可以免費換一個本地遊名額。首批一百三十六個行程嘅名單,噚日正式出爐,反應好似上次咁空前熱烈,唔駛大半日,就吸引到二千多人報名參加,唔少旅行團即時額滿。

  旅發局話,截至噚日下午六點,首批一百三十六個「賞你遊香港」行程,已經有八十六個額滿,剩低二十六個行程,仲有少量名額。計返每個本地遊旅行團最多收三十人,已經有超過二千幾人報名參加,睇嚟大家都好心急,想早啲去玩吓散心。Kelly喺度建議大家及早報名,唔好輸蝕。

  其中一間舉辦「賞你遊」嘅康泰旅行社,推出本地團嘅行程包括到訪天際100「5G科技館」、遊覽西九文化區海濱長廊、將軍澳南區和大歎生蠔牛餐,昨日大約下午兩點幾全部名額爆滿,好受歡迎。

Kelly Chu

hd