Executive日記——林作面臨「百萬抉擇」 花生友叫咪縮沙 

  林作同「百億富三代」鍾培生相約喺九月十八日上演百萬拳賽《林鍾大戰》,受訓三個月嘅林作,上月參加咗《Energy Fight 2021拳擊業餘賽》熱身,喺附加賽最終回落敗,佢強調仍然會積極備戰。佢喺facebook分享自拍,大晒左邊眼肚位置嘅瘀青,又話:「今日將我的打腫眼照片send(發送)畀身在內地的媽媽,媽媽馬上打來,要求我退賽。」佢透露媽媽用一百萬利誘佢退賽,於是問網民:「我應該攞我老母一百萬,定攞終賠(鍾培)生一百萬?」仲問︰「我係裙腳仔嗎?」

  帖文惹嚟網民熱議,有人笑言林作淆底縮沙:「而家先縮沙,係咪男人?」「你係裙腳仔就緊(梗),如果你打都叫做有啲骨氣,唔打就真係冇人睇得起你!」Kelly想睇下林作苦練嘅成果,希望佢唔好咁易放棄!

Kelly Chu


hd