Executive日記——馬會當選最具吸引力僱主No.1

  良好僱傭關唔係家家公司做到,香港賽馬會喺一個僱主品牌調查中,獲評選為香港最具吸引力僱主,Kelly知道係馬會首次喺呢個調查榮膺榜首,真係一啲都唔易。馬會每年都喺年中公佈花紅安排,Kelly希望佢哋都可帶嚟好消息,振奮吓人心啦。

  香港賽馬會喺國際人力資源機構Randstad噚日公佈嘅二○二一年僱主品牌調查中,獲評選為香港最具吸引力僱主,馬會過去喺呢個調查皆係前五之列,今年第一次排榜首。調查喺今年一月訪問二千六百三十名在職及求職人士,喺七十五間大型企業中,各項指標獲最高整體評分。調查指馬會喺貢獻社會、財政健康,及疫情期間工作保障等有出色表現。

  要做到疫情期間「馬照跑」,馬會人力資源及組織發展事務執行總監王舸話過去一年,全賴員工努力,未來持續投資員工能力發展至關重要,期望吸引更多人才加入。

  Kelly知道馬會每年七月都會決定員工花紅安排,按員工表現派發,去年都有出花紅,Kelly相信呢個最具吸引力僱主,今年都應有好消息畀員工啦。

Kelly Chu


hd