Executive日記——嘉道理農場出手 極瀕危「輻射龜」終有安樂家

  走私瀕危物種嘅手法可以好殘忍,幸有愛護動物組織好人做好事,Kelly知道十四隻從非法野生動物貿易救出嘅極度瀕危物種輻射龜,喺嘉道理農場野生動物拯救中心安排下,四月底已運去德國柏林動物園,參與保育繁殖同教育計劃。

  嘉道理農場暨植物園話,有外籍走私客喺二○一九年九月將五十五隻輻射龜用膠紙捆綁四肢,完全郁唔到,放喺行李入面,從非洲科摩羅島運到香港國際機場時被截獲;啲龜最終好好彩送咗去佢哋度照顧。當時大部份都體重過輕,仲有一隻腿部受傷。由於疫情影響,安排航空運輸好困難,至今年四月才安排到其中十四隻輻射龜去德國柏林動物園;其餘仲搵緊合適居所。Kelly希望呢啲珍貴動物,以後都唔使捱苦啦。

Kelly Chu


hd