Executive日記——車站展示施工出土文物 宋皇臺站抬頭賞宋代古井

  屯馬線全線喺呢個月二十七日通車啦!港鐵話,宋皇臺站設計二十米深、三十米闊,長二百米,設三個出入口連接社區,方便居民往返。同時,由於宋皇臺站喺施工時出土大量文物,所以會喺站內展示文物,焦點係一個古井,車站會揉合考古同藝術元素,等大家觀賞。Kelly覺得別具匠心,通車嗰日一定衝去打卡!

  宋皇臺站車站大堂設有兩個展櫃,展示出土文物,通車當日市民就可以睇到。同時,為咗彈性處理,港鐵將一個宋元時代嘅古井同連接的引水槽,喺車站上方原址重置,而車站大堂部份頂蓋將換成透明底板,方便大家喺車站大堂觀賞古井。

  港鐵話,宋皇臺站月台用咗泥土黃色,象徵宋皇臺嘅帝王歷史,而一號月台三號車門對出會展出藝術品,名為《大地陶詞》,由本地陶藝家黃麗貞創作,佢用當代手法呈現宋代美學,利用陶瓷浮雕,重新詮釋宋代嘅畫作,展示季節更替同日夜輪轉嘅美景,以陶瓷塑造日與夜、春季與冬季嘅景象,點綴月台柱身。至於土瓜灣站,會展出藝術家梁美萍嘅作品《家》,透過逾百位土瓜灣街坊分享嘅個人物品,講述土瓜灣嘅故事。

Kelly Chu


hd