Executive日記——機電署日內瓦國際發明展奪四金四銀 洗馬桶機械人 沖水殺菌吹乾一take過

  香港發明,榮獲國際殊榮。機電工程署喺日內瓦國際發明展獲得四金四銀嘅佳績,金獎包括實時升降機預測保養系統、智能自動梯實時監測系統、物聯網智能馬桶清潔系統同埋建築語義人工智能系統。馬桶都得獎,港人勁到呢!

  Kelly覺得其中一個獲金獎的物聯網智能馬桶清潔系統非常特別,系統令清潔馬桶自動化。馬桶清潔機械人喺兩分鐘內沖刷一個馬桶,以人工智能為馬桶內壁作實時圖像分析,按污漬級別自行判斷所需嘅清洗模式及水量,清潔後又用紫外線為刷頭殺菌和用吹風機吹乾,避免污染環境。署方話,馬桶清潔系統旨在減輕清潔人員壓力同改善廁所衞生,並非取締佢哋。

  除咗智能馬桶清潔系統,機電署與食環署和康文署合作研究嘅智慧廁所試驗計劃,將於七月喺兩個食環署轄下公廁應用,計劃監察公廁廁格嘅使用量及排隊狀況、室內環境例如溫度及氣味、消耗品如紙巾、洗手液嘅使用量,以及各種設備如乾手機等嘅狀況,避免大家人有三急時要面對臭氣沖天或者廁所無廁紙嘅慘況。署方同Kelly講,現時十七個康文署及食環署轄下嘅公廁,正計劃改裝成智慧公廁,初步選址為各區使用量較高嘅公廁、景點和少數鄉郊地區。

Kelly Chu


hd