Executive日記——同獲國家級肯定 中式長衫 天后誕 列非物質文化遺產

  香港有唔少女士都喜歡着長衫(唔少人稱為旗袍),貪呢類衫襯得女士身形好睇。香港中式長衫製作技藝同香港天后誕,成功列入國務院早前公佈嘅第五批《國家級非物質文化遺產代表性項目名錄》。Kelly希望政府繼續致力推廣本地嘅非物質文化遺產,令傳統文化得以延續。

  政府喺一九年六月應國家文化和旅遊部邀請,就列入《名錄》提交申報文件。今次成功申報嘅兩個項目,涵蓋聯合國教育、科學及文化組織《保護非物質文化遺產公約》所界定嘅「社會實踐、儀式、節慶活動」以及「傳統手工藝」類別,具有凸出嘅歷史同文化價值。

  中式長衫源遠流長,二次世界大戰後,大量上海裁縫師傅來港,豐富本地長衫製作工藝,更融合西式裁剪方法,形成香港獨特嘅長衫製作技藝。香港嘅中式長衫原本係婦女日常服裝,現已成為重要場合嘅優雅衣着。男裝長衫係新界傳統宗族長輩嘅身份象徵。

  天后又稱媽祖,喺香港好受重視,漁民為其建廟祭祀。每年農曆三月二十三日天后誕或另外選定日子,各區會舉行唔同規模嘅賀誕活動,可以話係香港文化其中一項重要範疇。

Kelly Chu


hd