Executive日記——寄語創科鬥士抽空陪屋企人 薛永恒讚父甘做開荒牛闖出事業

  創新及科技局局長薛永恒趁噚日係父親節,喺社交網站上載短片,講述自己父親嘅拓荒精神,話佢當年把握內地改革開放嘅機會,入內地做「開荒牛」,成功闖出一番事業。

  薛永恒喺短片中祝大家父親節快樂。佢話,爸爸由內地來港,當年一邊讀夜校一邊同師傅學機械工程,當時係「有食無工」嘅年代,即有三餐食但無工資,令佢覺得爸爸又勤力又捱得。佢話,爸爸學有所成之後試過開廠創業,曾經試過發展不順而「一鋪清咗袋」,後來把握改革開放嘅機會,去到內地做「開荒牛」,結果成功闖出一番事業,改變咗屋企嘅命運。

  薛永恒話,自出任創科局局長以嚟,不時同初創企業及年輕人交流,見到佢哋嘅堅毅拼搏同大膽創新,腦海便會浮現父親嘅影像,而佢依家都係兩個子女嘅父親,希望以身作則,將父親嘅拼搏精神傳承落去。

  佢同時希望大家,特別係喺創科路上拼搏嘅朋友,趁父親節抽空陪伴家人。

Kelly Chu


hd