Executive日記——力抗病魔 設計首飾籌款 小靖殷鼓勵病友永不放棄

  香港有好多激勵人心嘅好人好事,好似「願望成真基金」聯同香港迪士尼樂園,為年僅十歲,力抗病魔嘅蘇靖殷,實現佢設計首飾嘅夢想。靖殷好叻,力抗癌症,病情穩定之後,不忘追求美麗,由佢設計嘅首飾,用咗佢最喜歡嘅長髮公主同「永不放棄」作主題,出售所得嘅善款,將會用嚟幫助多本地病童實現夢想。

  樂觀積極嘅靖殷,喺小學二年級小腦生咗髓母細胞瘤,隨後整個三年級為治療而缺課。經歷腦部手術以及超過三十次化療電療,靖殷現時病情穩定咗。基金同迪士尼幫助佢實現夢想,令佢成為香港迪士尼最年輕嘅商品設計師,佢嘅作品概念源自《魔髮奇緣》中堅毅不屈嘅樂佩公主,設計出一條手鏈同一對耳環,表達永不放棄嘅精神,希望以自己嘅故事鼓勵其他病人,「只要永不放棄,就一定能過關,只要保持積極樂觀,就可以輕鬆面對」。

  靖殷話,好多身邊人不斷支持佢,佢先可以保持積極樂觀嘅心態同癌魔對抗。佢最想多謝每日不分晝夜陪伴佢嘅媽咪,仲話希望大咗可以成為兒科醫生,「因為我做過病童,知道點樣可以令小朋友睇醫生時開心一啲」。由靖殷設計嘅首飾,噚日起喺迪士尼樂園商店同埋基金官網發售,限量五百條,希望籌得逾十萬嘅善款,幫助更多本地病童實現夢想。

Kelly Chu


hd