Executive日記——霍啟剛自爆當年死纏爛打「追國寶」

  東奧呢個月底開幕,「霍家第三代」港協暨奧委會副會長霍啟剛近日頻頻出鏡,發聲支持香港運動員征戰東奧,而佢同「跳水皇后」郭晶晶嘅愛情故事,又引人入勝,二人已晉級為三個仔女嘅父母,佢哋接受賽馬會刊物《駿步人生》嘅訪問,霍啟剛唔單止自爆當年死纏爛打「追國寶」,亦分享「湊仔經」,仲話日後小朋友若堅持想做全職運動員,佢當然支持咁話。

  烈女怕纏郎,原來○四年郭晶晶喺雅典泳池比賽個陣,霍家公子透過電視對晶晶一見鍾情,之後國家隊奧運金牌健兒來港,霍啟剛喺晚宴上兩次搵女神合照,跳水皇后就疑惑:「點解影完又影?」。其後,郭晶晶去上海出席活動,霍啟剛跟住去上海,郭晶晶話:「之後無論我去到哪裏,又一定見到佢」。霍啟剛都話,國家隊封閉式管理,要見伊人一面都好難,自己當時真喺「死纏爛打」,最後以無處不在同無微不至嘅細心,打動女神。

  兩人婚後非常甜蜜,平日喜歡結伴逛街市買餸,又會帶兒女感受鄉郊氣息。霍啟剛喺社文平台分享,周末同屋企人喺三十四度高溫下一齊行山踩單車,仲話「喺屋企成日叫小朋友慳水,當佢哋去大自然走一轉,就更加明白水資源嘅珍貴」,要小朋友知道自然資源對未來好重要。

        訪問亦有提及霍家三代都參與體育發展,霍啟剛話「現在國家更重視全民健康、全民參與運動」,佢正思考應如何令香港市民投入體育運動。郭晶晶都認同,認為多啲參與,先知自己有沒有天份。

Kelly Chu


hd