Executive日記——葉劉千金滯留異國 食意大利馬拉糕解鄉愁

  英國接種疫苗率高,疫情卻大反彈,英國政府照樣放寬防疫管制,真係令人擔心,尤其有子女滯留當地嘅父母。由於港府宣佈咗就英國航機實施熔斷機制,由七月一日起禁止來港,好多港人就要先飛第三地,經迂迴途徑回港,其中一人,係行會成員葉劉淑怡個千金。葉劉話,女兒為咗趕及八月份回港同佢團聚,已完成接種兩劑疫苗,現時佢過境到意大利稍待幾天,隨後會前往法國暫住廿一天,回港時便可縮短強制檢測至七天。

  葉劉話,女兒到達米蘭後為咗節省開支,平日經外賣網上平台點餐,佢偶然發現有一款食物名為「torta soffice al vapore」,原來係「意大利版馬拉糕」。想不到源自香港嘅食物已傳至歐洲,更擁有一個意大利名字,實在有趣。佢話,或者女兒思鄉情切,遠在歐洲都品嚐呢款「變奏版本」馬拉糕喎。

Kelly Chu


hd