Executive日記——集合眾健兒表演霹靂舞 霍啟剛推精采節目為港隊打氣

  東京奧運會下周五開幕啦,港隊取得四十六張入場券,Kelly買定大堆零食睇直播,撐佢哋衝擊獎牌。港協暨奧委會副會長霍啟剛傾力為健兒打氣,佢昨日主持「香港隊加油」記者會,公佈一系列活動,包括霹靂舞表演、攀石活動、水上運動訓練營等等,鼓勵市民多郁動,同時一起向運動員叫「加油!加油!」

  霍啟剛身兼香港奧林匹克之友主席,佢哋聯同多個團體主辦「香港隊加油」,由七月二十三日至下月八日,推出一系列精采嘅節目,包括活動開幕典禮暨奧運同樂日、水上運動訓練營、家長同小朋友一齊玩嘅攀石體驗,仲有奧運首設嘅電競項目體驗等等。霍啟剛仲話,為咗令大家認識東京奧運新嘅項目霹靂舞Break Dance,香港體育舞蹈總會用咗一年時間,集合本港一眾Breaking運動員,為大家表演霹靂舞,希望市民對奧運有新嘅認識,同時一齊做運動,為港隊健兒打氣。

  兼任中國香港體操總會主席嘅霍啟剛,特別為港隊體操運動員石偉雄打氣,佢會同女子競技體操運動員黃曉盈一齊喺下周六睇石仔出戰奧運跳馬比賽嘅直播,遙距打氣。石偉雄以兩個難度分滿分嘅動作「李世光跳」出戰,Kelly知道石仔練習兩個超難動作過千次,對佢好有信心,支持佢衝擊獎牌。

Kelly Chu


hd