Executive日記——荃屯主幹線 分階段推 荃灣海濱段單車徑今開放

  鍾意踩單車嘅朋友,由今日起又有好去處。發展局局長黃偉綸發表網誌,屯門至馬鞍山嘅主幹線去年貫通,另一段長約二十二公里嘅荃灣至屯門主幹線正分階段推展,其中荃灣海濱段單車徑喺今日率先開放畀市民享用。

  黃局長請咗兩位同事介紹新嘅單車徑。土拓署高級工程師鄧可忻話,新單車徑沿荃灣海濱公園至灣景花園對出嘅海旁興建,長約二點三公里。除咗單車徑外,工程團隊仲喺沿途興建兩個休息處,附單車泊位同供踏單車人士休息嘅地方。另外,在海興路附近設有單車匯合中心,內設單車練習場、有蓋座椅、公眾洗手間、單車泊位、飲水設施等。令到鍾意踩單車嘅Kelly都覺得好貼心。

  土拓署工程師蕭民傑話,沿新單車徑,踏單車人士可以欣賞藍巴勒海峽和青衣島嘅優美景色,署方希望新單車徑可以進一步為荃灣海濱注入新活力,讓市民多一個消閒、康樂嘅選擇。疫情下,大家多做運動有益,新單車徑啱晒小妹同好動嘅朋友。

Kelly Chu


hd