Executive日記——港隊男神 顏值高夠健碩

  東京奧運會開鑼啦,噚晚開幕禮已經見到香港運動員準備十足,Kelly同朋友都好認真睇,除咗介紹過嘅靚女,仲發現港隊有好多靚仔,例如港隊靚仔持旗手、花劍代表張家朗,高大英俊嘅外表就令好多女士睇到入晒神。

  張家朗唔單止身高驕人,高一米九三,同埋健碩嘅身型,又有好似韓仔嘅感覺。佢比賽時認真銳利嘅眼神,與賽後經常微笑,好似鄰家男孩嘅形象有好大反差。男子花劍隊近年進步神速,「大師兄」張小倫亦非常厲害,多年嚟南征北討,大型賽事嘅經驗十足。大隻仔張小倫滿身肌肉,IG亦有多張分享運動嘅相,十分熱愛生活。

  港隊三項鐵人超級新星奧斯卡(Oscar Coggins),仲未滿二十二歲,喺東奧三鐵最年輕嘅選手。熱愛運動嘅奧斯卡,經常分享跑步、游水同埋踏單車嘅相,幹勁十足,充滿活力。港隊其中一個奪金希望,跳馬王子石偉雄(石仔)亦都非常有魅力,石仔嘅笑容有種單純療瘉嘅感覺,同時亦有一身結實嘅肌肉,可以知道石仔落足苦功操練。

Kelly Chu


hd