Executive日記——劉詩昆開鋼琴學院送給囡囡

  國寶級鋼琴大師劉詩昆同太太孫穎創立嘅鋼琴學院,昨日舉行開幕禮,Kelly知道好多猛人嚟到恭賀做主禮嘉賓,好似金牙大狀清洪、貿發局主席林建岳等,而劉老師同孫穎帶埋八個月大女兒劉蓓蓓(貝貝)到場,可能真係遺傳到優良音樂細胞,貝貝聽到音樂便手舞足蹈,可愛到極致。

  全國人大常委譚耀宗、保安局局長鄧炳強、香港貿發局主席林建岳、前律政司司長梁愛詩、資深大狀清洪、藝人汪明荃、華人置業前主席劉鑾雄太太「甘比」陳凱韻等,都嚟到擔任主禮嘉賓,真係星光熠熠。

  呢間鋼琴學院係劉老師與孫穎送畀女兒嘅禮物,孫穎透露投資咗三千六百萬元,原定去年聖誕開幕,因疫情關係延期,佢同劉老師會親自教授,亦聘請國際教授級音樂家來港授課。

  孫穎更會開辦星座分享,教家長如何按星座配合子女,「我同女兒都係天蠍座,心意相通,傳承音樂最重要。」佢仲話劉老師會親自教授囡囡。孫穎亦透露兩、三年內會創辦「劉詩昆獎」,表揚同鼓勵行內有重大貢獻嘅人。

Kelly Chu


hd