Executive日記——賀港健兒東奧創佳績 電車擬請市民免費搭「叮叮」

  當香港運動健兒喺東京奧運締造歷史嘅時候,香港電車同樣都獲得世界紀錄,被健力士世界紀錄認證為「最大的服務中的雙層電車車隊」。喺香港人雀躍於運動員佳績,香港電車話諗緊畀全港市民可以一星期免費搭「叮叮」齊齊慶祝,Kelly都希望佢哋最終可以畀港人多一個喜訊啦。

  香港電車踏入一百一十七周年,「叮叮聲」相信係香港人最熟悉嘅回憶。立足港島過百年,香港電車擁有一百六十五輛雙層電車,每日平均接載乘客高達二十萬人次,難怪香港電車可以成為「最大的服務中的雙層電車車隊」健力士世界紀錄保持者。

  香港運動員喺東京奧運拎金奪銀咁大件事,香港電車話雖然公司規模唔大,都想慶祝港隊喺奧運拎獎。佢哋留意到,港鐵以及巴士公司為獲牌運動員提供免費乘車,本來諗住提供類似優惠,但又覺得電車成人票價得兩個六港元,對獲獎牌嘅運動員嚟講「有啲冒犯」,所以諗緊畀全港市民可以一星期免費搭「叮叮」,一齊慶祝,樂意與政府探討方案。電車公司仲計劃畀拎獎嘅香港運動員,坐電車巡遊,正等待政府批准。Kelly都好期待呀!

Kelly Chu


hd