Executive日記——中西區商會獎賞 有機抽中八両金

  長達一年半嘅疫情,帶來好多改變,包括心態,中西區多個商會同組織唔再等客觀環境變好,而係主動出擊,發起「吃喝玩樂 開心中西區」消費獎賞計劃,鼓勵市民去接種新冠疫苗,希望本地疫情盡快消退。區內共有逾五百間商戶參與,將由八月中至明年一月送出超過二千萬元嘅禮品及優惠。

  呢次中西區自發嘅谷針計劃,獎賞會由本月起舉辦共六次足金抽獎,首五次抽獎每次會有八位得獎者各得一両足金,第六次抽獎則由一名得獎者獨得八両足金,已接種一劑疫苗並在中西區居住或工作的成年市民均可參與。

  有參與計劃嘅藥材店舖,喺計劃下推出買蟲草送元貝等優惠,期望在這個計劃及消費券嘅推動下,至少增加二至三成生意額。亦有參與計劃嘅舊式超市,會在六個月內推出九五折優惠,並正在申請各種電子支付工具,相信生意額較上個月提升五成至一倍。

  「吃喝玩樂開心中西區獎賞」計劃係由香港中西區各界協會、中西區發展動力、中區街坊福利會、西營盤街坊福利會、西環街坊福利會、摩星嶺街坊福利會及其他區內歷史悠久嘅社團聯合推行,整個計劃將合共推出超過二千萬元嘅優惠及獎賞。

Kelly Chu


hd