Executive日記——已打針免費入場 名額三萬 美食博覽下周四開幕 追擊「一蚊優惠」

  舊年疫情搞到Kelly無啖好食,除咗少咗上餐館,仲無咗美食博覽。等咗一年,美食博覽下周四捲土重來,今年有八百八十個展商參與,小妹知道今年會有大家好期待嘅「一蚊系列」,包括海味、奶茶等。貿發局又提供三萬個名額,畀至少打咗一針疫苗嘅人免費入場。

  美食博覽一連五日喺灣仔會展舉行,一眾參展商應大家期望,推出眾多「一蚊優惠」,例如鴻星推出嘅一蚊海味盛薈,原價一百九十八元,配料有齊鮑魚、冬菇、海參等。此外,仲有好多優惠產品,好似有齊杯麵同薯片嘅合味道福袋、奇華LINE FRIENDS月餅福袋等。貿發局仲話,有八成半參展商會接受電子消費券付款,主辦單位更加會每日舉行大抽獎,買滿二百元就可以抽獎一次,換取禮品。

  今年美食博覽嘅成人票價係二十五元,三歲或以下小童及六十五歲或以上長者免費入場。因應疫情,今年場內禁止飲食,大家無得喺場內試食,但貿發局會提供三萬個名額,畀最少打咗一針嘅市民免費入場!

Kelly Chu


hd