Executive日記——「波點女王」南瓜慘變南瓜湯 港裝置藝術防風有要求

  喺有「現代藝術之島」之稱嘅日本香川縣直島町,有藝術家草間彌生設計嘅「黃色南瓜」裝置藝術,吸引好多香港人專程去打卡,估唔到日前畀颱風「盧碧」吹咗落海,網上瘋傳變成「南瓜湯」。有朋友問Kelly,香港海旁都有好多雕塑同裝置藝術,如果颱風打埋身,會唔會吹落海呢?小妹請教工程界朋友,佢話當局對公共地方嘅雕塑同裝置藝術有防風守則,所以唔會發生吹落海嘅事件。

  工程師鄧銘心同Kelly講,公共地方嘅雕塑同裝置藝術,都屬於「臨時建築物」,都受《香港風力效應作業守則》嘅規管,守則規定唔同結構建築物需要達到嘅標準,包括承風能力等。任何商場如果喺戶外擺裝置,都要經屋宇署批准,符合《守則》,先可以豎起同作公開展覽。o依家全港海旁都有好多臨時裝置藝術,例如西環卑路乍灣嘅「海濱共享空間」實驗場、尖沙咀K11 Musea嘅《玫瑰II》等。據悉,其實各大商場都有專門團隊管理商場公共空間擺設嘅藝術品,確保安全。

  據Kelly知道,好似早前「盧碧」襲港,K11 Musea就將《玫瑰II》暫時收起,等颱風過後先重新擺返出嚟。

Kelly Chu


hd