Executive日記——幽默不失實際需要 九巴「靚抽」林鍾大戰:適時讓路救護服務

        林作同「富三代」鍾培生嘅百萬拳賽,本月十八日喺九龍灣國際展貿中心上演,呢場拳賽可謂城中熱話,Kelly覺得睇熱鬧之餘,都要確保安全。九巴都識做趁機「抽水」,佢哋每逢有演唱會或大型活動,都會公佈加強服務,對於呢場拳賽,佢哋就溫馨提示需要時讓路畀緊急救護服務!

  九巴指會喺今明兩日嘅演唱會、本月十八日嘅培生擂台「林鍾大戰」同十九日嘅音樂祭,為喺九展參與活動嘅觀眾,散場時段加強巴士服務,畀觀眾方便快捷前往港、九同新界各區。點知佢仲有一句:「因應九月十八日的特別活動,九巴將密切留意會場一帶的路面情況,適時作出讓路,以配合有需要人士盡快能接受緊急救護服務。」

  唔少網民睇到都讚「抽水」抽得過癮,林、鍾兩位不時口水戰,講到要狠狠教訓對方,唔少人都覺得林作身形較輸蝕,較為睇低一啲,Kelly都認為為求安全,讓路救護服務畀有需要嘅人,真係幽默得嚟又切合實際需要。

Kelly Chu




hd