Executive日記——體驗海洋公園深谷飛瀑 試玩員數秒「跌」五樓

  追求刺激嘅人等咗好耐,就快等到海洋公園水上樂園開幕啦!當大家幻想新設施有幾好玩同幾刺激時,海洋公園嘅「滑梯試玩專員」率先體驗一下,並且喺fb同IG出片,其中「深谷飛瀑」,幾秒鐘就「跌」落咗五層樓,水花四濺,真係連大叫嘅時間都冇!

  海洋公園水上樂園公佈喺九月二十一日開幕,園內設有五大主題遊玩區域,合共有二十七個室內及戶外玩樂設施,係亞洲首個兼唯一一個全年、全天候開放嘅臨海水上樂園!

  據Kelly所知,近日海洋公園嘅員工開始試玩各項設施,仲喺網上發片留言,引起大家關注。有員工試玩「深谷飛瀑」,形容眨吓眼就「飛」落去「深谷」!反問大家敢唔敢挑機?Kelly睇段片都好好奇,「咦,喂,等……呀呀呀!」原來係玩緊「深谷飛瀑」!行入「太空倉」嘅時候,雙手交叉喺心口前,交叉雙腳企好! 聽到「three, two, one」嘅下一秒就要被「飛」落五層樓,真係連呼吸都開始緊張呀!當你仲諗緊條梯到底有幾直嘅時候……突然之間!眼都未眨得切,就已經「跌」咗落去啦!片中就係「滑梯試玩專員」嘅第一視覺,睇片都已經覺得「巧驚驚」。Kelly都諗緊敢唔敢挑機呢?

Kelly Chu


hd