Executive日記——免費履歷評估及模擬面試 非牟利平台 幫求職者裝備自己

  疫情下被裁員,想搵番份工,一啲唔容易,不少求職者束手無策。前大集團高層眼見唔少被裁嘅員工搵工難,創辦一站式職涯發展體驗嘅非牟利平台Newgig,幫失業人士裝備自己,更有專業人士提供免費嘅履歷評估及模擬面試,等佢哋重新向職場出發。

  身為社會企業諮詢委員會成員嘅黃思遠(Stephen),曾任職亞洲萬里通行政總裁,喺太古、國泰航空等大公司擔任過管理層職位,佢眼見上年不少企業裁員,有工作咗好耐嘅朋友都難逃一劫,想轉工又冇方向,於是創辦非牟利平台Newgig,幫助打工仔了解市場,裝備好自己。

  Newgig搵咗不同講者從多方面提供幫助,如臨牀心理學家提點如何處理壓力、兩位科技公司員工介紹如何進入數碼營銷及創意達人之路等。

  同時,平台搵嚟一班擁有人力資源資格及經驗嘅義工幫助求職者,包括執履歷同埋練面試技巧,武裝失業者去搵工!

  此外,Newgig亦同香港國際專業教練協會合作,為求助人提供兩次免費嘅教練體驗。呢啲教練肯幫手,係想了解自己服務嘅影響力,同時令失業人士受惠。Stephen話,原本預計不少旅遊業、餐飲業人士有需要,但發現好多「裸辭」想轉工人士、大學生等都有需求。佢同求職者講,唔好灰心,最緊要了解自己同市場,去迎接新工嘅挑戰!

Kelly Chu


hd