Executive日記——油麻地天后古廟打卡點 珍貴木製龍舟 貼金箔祈福

  旅發局推出「大城小區」活動,今次聚焦西九龍,其中一個景點,係法定古蹟油麻地天后古廟。Kelly趁熱鬧,走去參觀,裏面別有天地,喺廟最南側成立咗一間「油麻地書院」,變身成文青自助書店,專門售賣香港專題、香港及中國歷史、宗教哲學書籍,以及一系列有關香港廟宇文化的文創產品,內裏仲有多個打卡位,好似車仔檔,仲有一條由珍貴木頭製成嘅龍舟,俾善信貼上金箔祈福。

  負責管理呢間咁特別書院嘅東華三院人員話俾Kelly知,呢條木龍舟採用嘅珍貴木頭打造,原本香港係唔准入口呢啲木頭嘅,係由海關喺反走私行中檢獲,由於已經入咗口,唔想丟棄浪費咗,於是送俾一啲慈善廟宇做裝飾。

  東華三院就請來工匠,以呢啲珍貴木材打造一條木龍舟,供善信捐少少錢買一塊金箔貼上,貼嘅位置唔同,有唔同嘅效果,好似學生就啱貼龍頭,以求「傲視同儕,學業猛進」。在職人士就應該貼扒龍舟嘅人員身上,以求「工作順利,一帆風順」。至於Kelly就貼當然龍尾啦,點解?係祈求「行運行到尾」。大家去開油麻地,不妨入天后古廟貼下金箔,祈求天后娘娘保佑下。

Kelly Chu


hd