Executive日記——兩大廚藝學院 囊括55獎 香港國際美食大獎 海鱸三食贏金紫荊盃

  香港酒店及餐飲業界盛事HOFEX2021日前結束,當中重點節目係香港國際美食大獎(HKICC),吸引眾多廚師切磋廚藝,Kelly知道國際廚藝學院同埋中華廚藝學院嘅學員及畢業生表現出色,囊括五十五個獎項,畢業生李鎂欣更憑海鱸魚「三食」,同其他大廚較量後贏得金紫荊盃,好厲害呀!

  兩年一度嘅HKICC設有中式烹調、西式烹調及糕點等多個比賽項目,其中李鎂欣得獎嘅「金紫荊盃─中式熱盤」比賽,係由四位最高分數嘅中式熱盤廚師獲邀競逐,比賽以「黑盒方式」進行,大會比賽前一晚通知入圍者,同公佈比賽主題,佢哋只有半日準備,極具挑戰性!

  今年以海鱸魚為主題,年僅二十五歲嘅李鎂欣分別以三種各有風味嘅配料同醬汁、配以蒸、炸、焗做出海鱸魚「三食」,其中潮州豆醬蒸魚更做出家鄉風味,勇奪金紫荊盃。佢話好感激師傅悉心栽培,每次比賽都會確立目標並專注改良菜式。

  同時,會展管理公司飲食部團隊都喺HKICC勇奪三金、二銀及三銅嘅佳績,其中喺隊制「現場下午茶比賽」組別中,除贏得金獎,更奪得「最佳成績」殊榮。Kelly睇到都想有機會試吓呀!

Kelly Chu

hd