Executive日記——有一半中國人血統 18歲英版楊丞琳美網球賽奪冠

  識打網球但唔叻嘅Kelly,昨日校好鬧鐘,同好多網球朋友一齊通宵追看美國網球公開賽,因為有兩位美少女對決,結果由英國十八歲嘅拉杜卡努(Emma Raducanu)奪冠。佢有一半中國人嘅血統,小妹望真啲,佢皮膚稍為黝黑,但樣子甜美,仲有啲似台灣藝人楊丞琳,所以有台灣球迷就稱呼佢做「英國楊丞琳」。

  喺美國網球公開賽女單決賽,世界排名一百五十嘅拉杜卡努,以6:4、6:3,直落兩局擊敗排名比佢高七十七位嘅十九歲加拿大費南德茲(Leylah Fernandez),奪得佢人生第一座大滿貫金盃。由於拉杜卡努嘅父母分別係羅馬尼亞人同華人,所以全球好多華人都為佢打氣,佢不負眾望,由外圍一直殺入決賽,仲係從未失一局,以十連勝贏得冠軍,所以媒體稱讚係「神奇之旅」。

  拉杜卡努喺○二年出生於多倫多,父母親都係來自學術家庭並從事金融工作,兩人希望為怕醜嘅女兒提供多樣化興趣同運動技能,所以佢從小學習騎馬、游泳、芭蕾舞、籃球、滑雪、高爾夫,甚至是卡丁車同越野摩托車,直至選擇咗職業網球後,就展現咗驚人嘅天份,今屆先喺溫布頓錦標賽嶄露頭角,首項大滿貫就打進十六強,跟住喺美網一鳴驚人,成為女單冠軍,收下二百五十萬美元嘅獎金。呢名擁有一半亞裔血流嘅網球新星,直言自我要求極高,「我對自己有很高標準,這幫我達到喺網球同學校成績嘅高水準。」

Kelly Chu


hd