Executive日記——搞搞新意思 加入茶餐廳咖啡館等概念 投注站點只落注咁簡單

  以後去馬會投注站,唔單止投注咁簡單,仲可以享受輕鬆一刻。Kelly八卦到,香港賽馬會為咗令人覺得投注站與時並進,將會變身,向訪客提供唔同嘅體驗,好似加入茶餐廳同咖啡館等,希望將賽馬推廣成一種生活文化。

  有馬會朋友同Kelly講,之前投注站因疫情而要關閉,唔少人改為網上投注,實體嘅投注站依然唔少得,因為可以用嚟推廣賽馬活動,唔單止係一班上年紀嘅人嚟,仲可以適合年輕一輩,具體嘅改變,就好似北角場外注站改裝,加咗「永勝冰室」,而將軍澳日出康城新開嘅投注站入面就設活動專區,提供模擬賽馬嘅遊戲,仲有大型電視屏幕直播足球賽事,等入內嘅人有一種休閒嘅感受。

  另外,好多市民鍾意去嘅中環士丹利街投注站,仲會搶攻女性市場,將會首創專為女士而設嘅咖啡室,料喺明年第二季開幕。至於外國都好識包裝賽馬活動,好似將騎師打造成明星咁,馬會朋友就話,香港要咁推廣可能有難度,可能會被人質疑過度宣傳賭博,咁多年嚟宣傳都要小心平衡各方嘅觀感咁話喎。

Kelly Chu


hd