Executive日記——「威威水地帶」超級打卡點 水柱傾瀉影相好過癮

  海洋公園水上樂園未正式開幕,社交平台上就出現好多相片,原來園方近日接待不同界別人士試玩,Kelly睇見啲水花四濺相片,成個人都涼快咗,其中有朋友上載嘅幾張連環相片,見到有大水柱傾瀉而出,有小朋友好開心擺pose影相,真係好過癮!

  水上樂園定於本月二十一日正式開幕,好多人期待入內尋刺激。園內設五大主題遊玩區域,合共有二十七個室內及戶外玩樂設施,係亞洲首個兼唯一一個全年、全天候開放嘅臨海水上樂園!有朋友試玩過後話,「威威水地帶」係一個啱小朋友玩嘅設施,內有一個超級打卡點,只要叫小朋友企好,後面上方就有個出水口,大水會喺短時間內噴出,好似山洪暴發咁嘅場面,非常狀觀,而小朋友被大水照頭淋一刻,亦笑個不停,最啱大人幫佢哋影低開心嘅一刻。朋友話呢度有兩條水梯都好刺激,大家去打卡,記住着沙灘鞋,仲要帶電話袋防水,真係好建議,小妹已急不及待去買飛了。

Kelly Chu


hd