Executive日記—— 「FriendsWithYou」 穿梭西九 坐電車宣揚和諧歡樂

  Kelly早前喺電車,留意到有幾個圓溜溜、色彩繽紛嘅角色出沒。旅發局朋友話,佢哋喺由國際藝術家Samuel Borkson及Arturo SandovWal lll組成嘅「FriendsWithYou」所創作嘅角色,同當局合作展開「香港.大城小區」─西九龍項目第二浪宣傳,聯乘香港景點拍攝影片、設置大型藝術裝置等,希望鼓勵大眾以藝文新角度探索香港。

  FriendsWithYou兩位藝術家表示:「好榮幸有機會喺香港展出新系列——Happy World,咁大規模都喺亞洲首次,藉此希望傳達和諧及歡樂嘅訊息。」一眾FriendsWithYou角色早前剛到埗已急不及待穿梭香港景點,包括到訪「全球規模最大嘅文化項目之一」嘅西九文化區;乘坐香港電車,見識全世界「最大嘅服務中嘅雙層電車車隊」。

  角色們將會化身十二個大型充氣裝置,於下周四至下月十四日期間喺西九文化區藝術公園隆重登場,約定大家一齊打卡,當中最矚目莫過於有超過三層樓高嘅巨型充氣招牌角色Little Cloud。

  此外,由下周四起,FriendsWithYou角色會喺六個景點虛擬現身,包括西九文化區藝術公園、戲曲中心、油麻地天后廟、油麻地果欄、廟街夜市及尖沙咀星光大道。市民屆時到訪以上景點,以手機掃描景點展示的二維碼,一眾角色便會生動介紹西九龍藝文景點,帶大家深度遊覽西九龍。

Kelly Chu


hd