Executive日記——智能機械系統 助追蹤兼防疫 中大醫院「零人手」執藥洗衫

  喺呢個月正式開幕嘅香港中文大學醫院,外形先進,內裏有乾坤。據中大校長段崇智話,中大醫院有好多智能設備,例如執藥系統同洗衣系統,都令人大開眼界。佢仲介紹,中大校友去中大醫院預約驗身服務,仲享有優惠O添!

  中大醫院係一所非牟利、私營教學醫院,由中文大學全資擁有。醫院本着平衡香港私營同公營醫療體系差異嘅社會責任,為病人提供優質、可負擔同具透明度嘅醫療服務為己任。中大校長段崇智同Kelly講,醫院一開就受到市民歡迎,好多人預約注射新冠疫苗。由於係全新嘅醫院,採用最先進嘅智能系統,佢去參觀過,話歎為觀止。

  段校長話,好似執藥系統,不需人手,由一組機械人按輸入指示尋找藥品,「喺地底見到啲機械人穿梭。」仲有,一般醫院會用人手加機械洗衣,又要人手分配,但中大醫院就全智能化,透過標籤識別同紀錄每一件衫屬於邊個醫護,幾時接觸過邊啲人,幾時洗過,有助追蹤兼防疫,的確先進。段校長話,中大醫院嘅驗身服務比私家醫院平好多,尤其校友可以享優惠。咁市民同校友有需要,就要充份利用啦!

  另外,中大於本周四舉辦首屆中大創新日暨創博館開幕禮,跟住昨天同明天連續兩日舉行中大創業日,展示中大教授、校友和學生的多項科研成果,如何解決人類生活上的難題,應對各種挑戰,並改變世界,好適合各創科業同學生參觀㗎!

Kelly Chu


hd