Executive日記——韓迷追劇打卡福音 旅發局創意之作 招韓劇綜藝來港拍

        Kelly追劇嗰陣,見到熟悉嘅街景都會好興奮。旅發局同韓國頂尖娛樂媒體公司CJ ENM簽署三年嘅諒解備忘錄,計劃喺國際旅遊恢復後,合作安排韓劇及綜藝節目嚟香港取景拍攝,吸引韓迷以後多啲嚟香港玩及搵景打卡!

  相信一班韓迷對CJ ENM應該唔會陌生,CJ ENM旗下合共擁有十二個電視台,包括著名嘅tvN及Mnet,網絡涵蓋美國、日本、東南亞市場,提供各類劇集、綜藝及音樂節目等,多個經典韓劇如《愛的迫降》、《鬼怪:孤單又燦爛的神》同埋大熱綜藝《新西遊記》、《尹食堂》等,都出自CJ ENM旗下嘅tvN。

  旅發局係全球首個旅遊推廣機構同CJ ENM簽訂同類備忘錄,計劃二○二二至二○二四年期間安排劇集或綜藝來港取景,一眾炙手可熱嘅韓星亦會現身香港,亦會喺唔同嘅節目中注入香港嘅獨特文化和精采體驗。等大家日後可以喺韓劇睇到,見到香港熟悉嘅街景,令香港成為一眾韓迷及遊客追捧嘅旅遊點。

  CJ ENM娛樂媒體廣告方案部執行副總裁李相武話,好高興可以向觀眾,展現香港嘅魅力和迷人之處。旅發局主席彭耀佳都話,希望全球觀眾睇韓劇或綜藝節目嘅同時,亦能夠欣賞到香港獨有嘅風景及文化,藉此吸引更多韓流粉絲,在旅遊重啟時到訪香港取景地點朝聖,掀起香港旅遊熱潮。

Kelly Chu


hd