Executive日記——資助1500小學生 參加生態講座 甘比化身「保育特使」向海洋公園捐千萬元

  為咗支持保育,提高公眾嘅保育意識,劉鑾雄慈善基金昨日宣佈,分五年向海洋公園保育基金捐出一千萬元,以支持推行「自然保育小先鋒」、「氣候變化倡導」兩大保育計劃。劉鑾雄太太、慈善基金信託人之董事陳凱韻(甘比)唔單止同海洋公園保育基金主席陳晴簽訂承諾書,仲化身「保育特使」,呼籲市民採取行動,應對氣候問題。

  兩大保育計劃會係今年起至二〇二六年推行,為期五年。其中「自然保育小先鋒」計劃每年資助三百名小四至小六學生,參加保育活動,包括出席生態保育講座、探訪海洋公園動物等,目標係令參與計劃合共一千五百個小學生,理解到保育嘅重要性。

  「氣候變化倡導」計劃就邀請甘比擔任「保育特使」,佢日後將親身拍攝宣傳短片,並透過社交平台帳戶、安排旗下物業擺放宣傳物品、親身視察瀕臨絕種生物等方式,令公眾關注氣候變化議題。計劃預期可以喺社交平台上吸引五十萬人次收睇。甘比就話,自己從細就鍾意海洋生物,好高興能夠同海洋公園保育基金合作推動保育工作,為動物締造舒適嘅棲息地。

Kelly Chu


hd