Executive日記——沙田快閃宣傳消費券 財爺化身雪糕車師傅 唧雪糕與民同樂

  第二期消費券昨日發放,財政司司長陳茂波為咗宣傳,昨日特意化身雪糕車師傅,快閃到沙田派雪糕畀市民,希望同市民分甘同樂,一齊慶祝節日。司長仲話自己細個好鍾意食雪糕,但係整雪糕嘅技術「仲要多加練習」,會愈嚟愈好喎。

  適逢又係十一國慶假期,財爺快閃落區,送雪糕畀市民,Kelly知道司長都花盡心思,同雪糕車師傅學「唧」雪糕,之後更化身雪糕車師傅,親自為市民送上凍冰冰嘅軟雪糕,啱晒大熱天氣消暑,司長都話自己好興奮。佢之後走出雪糕車,同一班市民傾偈,更提到自己細個都好鍾意食雪糕。

  一班收到雪糕嘅大人小朋友都好開心,不停同財爺打卡,非常熱鬧。司長亦非常細心,見到其中一位爸爸幫晒仔仔囡囡拎,但冇拎畀自己,財爺即刻拎個雪糕杯,衝去送畀爸爸,希望人人都有得食!被問到覺得自己整成點,司長笑笑口咁講「我整雪糕仲要多加練習,會愈嚟愈好㗎啦!」

Kelly Chu


hd