Executive日記——反暴巨型水馬Bye Bye 公路近米水馬繼續服務

  圍繞部份政府建築物嘅巨型水馬近日被移走,完成咗保護嘅任務。據從事水馬業嘅人士講,呢種巨型水馬喺係近年暴力示威盛行後先至引入香港,之前從未見過。而本港最常用嘅一款水馬,係由路政署指定用於馬路之上,要符合當局嘅規格,約高零點九米。Kelly諗,隨著巨型水馬退役,大家以後都多數只會見到細水馬。

  據水馬業內人士講,保護政府建築物嘅水馬,起碼有三米高,採用特厚嘅塑膠製造,好硬淨,「即使唔入水,都好重好難移動。入咗水,更加穩陣。」據呢位業內人士話,喺暴力示威之前,都未見過呢類巨型水馬,而平日大家見到嘅一款,喺放在馬路旁,約長1500mm、高900mm、480mm,重約十公斤,按路政署規格,必須貼上反光橫條。

  Kelly八卦,上淘寶網搜尋水馬,真係乜嘢形狀都有,有一幅牆咁高,有欄杆狀,亦有圓筒型,每款都有不同功能。看香港嘅巨型水馬,就可以看到一個時代嘅變遷。

Kelly Chu


hd