Executive日記——航班上遭無戴口罩乘客「圍攻」 港夫妻飛美中招:覺得會瞓瞓吓過身

  外國疫情仍然好嚴重,Kelly真係唔鼓勵大家周圍飛。一名八十後港男就喺社交平台分享佢「痛不欲生」嘅經歷,話三個月前同太太坐飛機去美國,喺航程中被無戴罩嘅乘客「圍攻」,懷疑咁搞到夫婦二人一齊感染Delta變種病毒!

  樓主憶述當時飛機滿客,佢前後左右分別坐住幾個無戴口罩嘅人,雖然空姐提醒各人戴上,但佢走開後,各人又除罩。至於樓主自己,就打孖戴咗口罩同面罩,仲戴埋手套,喺飛機上十四小時只係食咗一餐。佢一落機就出現症狀,之後,佢同太太一齊被美國當局安排去酒店免費隔離,樓主中咗招:「覺得會瞓瞓吓過咗身!」佢又話有人定時巡房敲門「確保我未死」,隔離期間佢不斷「發燒、退燒、發冷、頭痛、咳嗽」,完全失去胃口,好彩佢仲後生,病咗十日,靠自己免疫力康復,足足瘦咗十磅,感慨「好彩我同佢(妻子)大步檻過」。

Kelly Chu


hd