Executive日記——林鄭唔識得MIRROR

  男團「MIRROR」好紅,但特首林鄭月娥直言「唔識」佢哋。對於日後特區政府設立文化局,會唔會好似內地咁規管「娘炮」藝人,佢就話香港實行一國兩制,如果無違法,一定可以多元發展。

  林鄭發表咗《施政報告》後,昨早出席電台節目解畫,有主持人形容香港人情緒鬱悶,但有男團冒起帶嚟唔少歡樂,問林鄭有沒留意本地嘅男團,林鄭好直接答「唔識」。之後主持人再問將來設立文化局,會唔會跟隨內地咁規限「娘炮」(意指喺某些方面女性化嘅男性)藝人,林鄭話,香港實行「一國兩制」,中央亦支持特區施政,如果有文化事業「踩界」,觸及《國安法》等法例,當局會採取行動,如果冇「踩界」,一定保證多元發展。

  另外,保險界議員陳健波就喺立法會《施政報告》答問會上批評,政府嘅中文水平低,唔少市民反映政府文件嘅中文行文複雜,部份似係英文直譯,好似法律條文咁冗長,好難理解。林鄭回應時形容官員「一把年紀」,重新學習有難度。佢承認文宣工作係政府弱項,希望團隊「多睇書」,仲話會要求公務員事務局長聶德權把中文課程加入公務員學院。

Kelly Chu


hd