Executive日記——渣馬籌辦飽經風雨記者會場竟水浸

  渣打香港馬拉松籌辦過程可謂飽經風雨,疫情窒礙賽事外,連記者會都遇風雨影響,一度要暫停換地點。Kelly都覺得應晒呢項活動嘅「黑仔」經歷。

  因疫情延期嘅渣打香港馬拉松將於本月二十四日舉行,主辦單位昨早喺維園網球場室內地方,舉行賽事安排記者會。橫風橫雨喺室內搞記者會,本來都係安全,點知滂沱大雨,加上可能排水管道唔暢通,夾雜住垃圾嘅污水突然由渠口倒灌而出,湧入室內,啲水多到淹浸地板。

  面對咁意想唔到嘅場面,馬拉松主辦方、香港田徑總會主席關祺等人都見慣大場面,只好暫停記者會,帶記者移師另一地方,繼續進行記者會。佢同記者講十月底天氣應該幾好,希望比賽當日,一切順順利利啦!

  至於「戲肉」馬拉松嘅安排,因應疫情已特設多項防疫措施,參加名額大減至一萬八千五百個,報名人數超額近一倍,為免人群聚集,今年跑手將分批起跑,起跑後選手可以除低口罩,直至到達終點後才須再戴上口罩。參加者可於本月二十一日至二十三日,到維園領取選手包,並須接受核酸檢測,完成檢測及健康申報嘅參加者,要戴上大會嘅手帶,直至比賽完結。

Kelly Chu


hd