Executive日記——VIVIENNE TAM線上時裝騷 「移師」昂坪

  疫情下,Kelly學懂自強不息,昂坪360亦發揮呢個堅毅嘅精神,破天荒同國際知名設計師Vivienne Tam合作,將時裝騷「移師」昂坪上,發佈VIVIENNE TAM 品牌首個線上時裝騷—「City Camouflaged城市縮影」,主題係Love Your Style。Vivienne Tam話,佢自設計系畢業以來,從未留喺香港咁耐,令佢有機會四處走一走,發覺香港真係好靚,令佢覺得要為香港做一個獨特嘅時裝系列。

  呢次係Vivienne Tam首次喺香港發表佢全球嘅新時裝系列,仲同昂坪360團隊一拍即合,一同發揮創意,不怕困難,登山搞呢次活動。Vivienne Tam話,佢未試過留喺香港成一年多,喺朋友引領下,首次去郊外行山,覺得香港之美,十分動人,佢又首次坐纜車上昂坪,見到機場、港珠澳大橋、翠綠山巒、大佛……好開心喺昂坪搞新系列時裝發佈,令全世界注視香港。

ART JAMMING啱晒型格人士

  上昂坪撐呢次活動嘅旅發局主席彭耀佳博士話,疫情下大家無法外遊,但只要用心發掘,香港有好多有趣嘅景點,好似局方最近推出嘅「大城小區」之西九龍深度遊,推介好多地道特色小店同景點,都好值得大家去探索同玩味。今次活動名為「昂坪戶外遊藝會Outdoor ARTcation」,仲有親子互動巨型木偶巡劇、本地藝術打卡牆、JAM出昂坪——ART JAMMING等活動,啱晒型格人士,仲係好FUN嘅親子節目。昂坪360董事總經理劉偉明話,今次昂坪360美景喺海外市場以全新形象呈現,期望疫情過後,成為海外旅客外遊首選目的地。

Kelly Chu


hd