Executive日記——「自愉工作坊」幫大家放鬆 香港圖書館節開始喇線上線下活動多籮籮

  Kelly閒時喜歡讀書,O依家仲多咗網上閱讀,鍾意實體書在手又得,望住手機閱讀又得。第三屆「香港圖書館節2021」就啱晒大家線上線下閱讀嘞,仲有一系列嘅文藝工作坊,小妹最想參加「自愉工作坊」,可以學好多手作小工藝,仲啱晒親子O添。

  由康文署舉辦嘅第三屆「香港圖書館節」,多項活動出籠,由即日起至下個月二十八日,分別喺香港中央圖書館同全港十八區公共圖書館推出,所有活動仲係免費入場㗎。

  「香港圖書館節」當然有各式各樣嘅線上線下閱讀活動,但參加者仲可以動下手,因為圖書節中設「自愉工作坊」,包括一系列DIY擴香石、鐵線玻璃花、曼陀羅創作、輕彩繪、拼貼書法及和諧粉彩等主題工作坊,運用藝術嘅力量,向文青同親子等不同背景嘅參加者傳遞正向思維,等佢哋放鬆繃緊情緒,積極面對人生。

  此外,仲有一連多場嘅「字癒互動故事坊」,由導師即場分享與治癒或個人發展有關嘅繪本故事,透過說故事技巧示範、遊戲及小手工製作,建立小朋友嘅社交同人際溝通技巧,等參加者一同享受親子閱讀嘅樂趣。大會仲邀得張韻珊、戴芸和Jon Klassen三位兒童繪本作家同小朋友及家長網上分享佢哋繪本創作。咁多活動,一定有一樣啱大家,快啲上康文署網頁了解下。

Kelly Chu


hd